Откако денеска беше регистриран првиот случај на инфекција со коронавирус во Хрватска, рафтовите во продавниците по хрватските градови почнаа да се празнат.
-Веројатно, некои од луѓето се исплашени по информациите од Италија, каде биле пријавени стотици случаи на инфекција со коронавирус и засега има седум мртви, како и од сликите каде што се гледаат полупразни продавници,- објавува Seebiz.
Најмногу се купуваат залихи на храна – првенствено ориз и тестенини, како и основни потреби, како тоалетна хартија. Луѓето купуваат и конзервирана храна, вода и средства за дезинфекција.
Во големиот синџир со продавници „Конзум“ веќе нема залихи од ориз. Истото важи и за брашно и интегрален тост, кои не се на залиха.
Во аптеките низ цела Хрватска има недостиг на заштитни маски, а некои и се обидуваат и да заработат пари. Имено, добавувачите кои се занимаваат со медицински материјали и фармацевтски производи нудат маски за околу едно евро (осум куни). Вообичаената цена на маската е 0,17 куни.
Инаку, првиот пациент со коронавирус во Хрватска неколку дена пред откривање на оваа болест бил на стадионот „Сан Сиро“ во Милано следејќи го натпреварот помеѓу Аталанта и Валенсија во Лигата на шампионите.
Од компанијата Ериксон Никола Тесла, каде е вработен, потврдија дека тој навистина бил присутен на „Сан Сиро“.
„Тој во средата, 19 феврури 2020, беше на годишен одмор во Милано, следејќи фудбалски натпревар. Потоа се врати в петокот на работното место во Загреб. Според информациите што ги имаме од неговото семејство, во неделата е примен во болница со симптоми на болеста, а дополнително е утврдено присуство на коронавирусот во неговиот организам“, се вели во соопштението на компанијата.
фото: 24 часа. хр
