Студентот по анимација на „Sheridan College“ во Канада, Виктор Ивановски е дел од екипата што работеше на анимираниот филм „The Fox and The Pigeon“ кој годинава ја освои престижната „ANNIE“ награда за најдобар студентски анимиран филм, на 47.то издание на манифестацијата „Annie awards“ во Лос Анџелес. Виктор, заедно со уште десет студенти работеа на реализација на филмот, при што Виктор е ко-режисер, а воедно е композитор и интерпретатор на музиката за филмот.
Анимираниот филм „The Fox and The Pigeon“ беше во трката за најдобар студентски филм во конкуренција од импозантен број анимирани филмови од целиот свет. „The Fox and The Pigeon“ доби позитивни стручни критики од светските експерти за анимација.
Инаку, Виктор Ивановски е студент на четврта година на „Sheridan College“ во Канада кој важи за еден од најпрестижните факултети во светот на полето на анимација. Тој е и првиот македонец што освоил ваква престижна награда за анимација.
