Зоран Михајлов
– Иако положи и доби диплома за готвач (!) во кујна влегуваше само да провери дали јадењето е по негов вкус.
-Патешествието во Опатија и поткупотна Комисијата
Седиме пред некој ден со Лазар Лечиќ, легендарниот и еден од најхаризматичните тренери во поранешна Југославија, и договарајќи се за тоа како ќе изгледа и што ќе содржи Академијата посветена на него по повод 80 години од животот, која ќе се одржи на 9 мај, во 13 часот во големата сала на хотелот Александар Палас во Скопје, нормално евоцираме спомени од минатото. Во еден момент се присети и почна да ја раскажува приказната за тоа како полагал за кувар, кога по втор пат таму во 70-сеттите години беше тренер на Олимпија од Љубљана. И јас се присетив на таа приказна, но ја имав малку подзаборавено.
-Тоа е приказна за себе, вели Лазо. Во тоа време некако модерно беше спортистите да отвораат угостителски објекти. Така,и мене ми падна таа идеа – и бидејќи вториот пат од мојот претстој во Љубљана, бев без семејството реков – ајде да го исполнам денот и да отворам кафеана. Имаше еден убав простор до салата Тиволи и мислев дека е тој супер за угостителска дејност. Меѓутоа знаев дека тоа ќе биде и товар за мене, па им предожив на моите играчи Јеловац и Суботиќ, кои исто како мене беа „дојденци“ во главниот град на Словенија, заеднички да отвориме кафеана. Тие веднаш се согласија и почнавме да кроиме планови како ќе биде и колкав ќар ќе имаме од сета таа работа.
Работата била готова, се договориле за вложувањата, ама искрснал проблем. Имено, никој од нив немал диплома за вршење угостителска дејност. Затоа решиле тројцата, едно претпладне кога немаат тренинг да заминат во Опатија и таму да полагаат испит за готвачи!
-Опатија и тогаш и сега е познат туристички центар,а во минатото главната испитна комисија за полагање за која и да е од угостителските дејности беше таму. Откако дојдовме во обејктот за полагање, тоа беше еден од многуте хотели во градот, еден од оние што претходно полагале и „паднале“ на испитот не препозна и ни пријде. Ни рече дека не е лесно полагањето, ако не дадеме некоја пара на членовите на Комисијата. Си помислив – зарем и тука има таква работа, – вели Лечиќ.
Кога сфатиле дека така мора да биде немало бегање , па и тие по совет на оној истиот кој по втор пат дошол да полага, ја примениле истата тактика. Таа била мошне интересна, но и неизвесна. Еве,во што се криела таа неизвесност:
-Секој од нас во кутија за цигари стави по илјада и петстотини марки. Сметавме дека е тоа доволно за добивање без мака диплома за готвач. Меѓутоа, прашање беше дали испитувачот ќе ја земе кутијата, – се сеќава Лазо.
Јеловац и Суботиќ полагаа пред мене, испитувачот како да сака да запали цигара ги зема нивните кутии. Значи,работата беше завршена. Ама,кога дојде редот на мене, долго време вртев околу поставеното прашање за тоа како се подготвуваат јадењата, не се сеќавам најубаво за какво јадење стануваше збор, а тој никако да „трзне“ да ја земе мојата кутија. Јас немајќи што да правам,кога веќе се уморив од зборување, и тоа без „врска“ зашто појма немав како се подготвува дури и наједноставното јадење, почнав да ја потурнувам кутијата кон него. Конечно се смилува, ја зеде кутијата полна со марки и мене ми олесна. Потоа, за неизвесноста да биде уште поголема ни рече да причекаме за да знаеме дали сме положиле или не. Си мислев-толку дадени пари и да не биде ништо, не ми се верува. Кога се уморивме од чекање излезе еден од членовите на комисијата. Во рацете ги држеше трите дипломи за положен испит за готвач, ни честиташе и ни ги подели дипломите. Добро е си помислив, не беше залудно доаѓањето, дадовме и “рушвет“, ама завршивме работа.
Ама,вестите на времето, а и сега се шират со голема брзина, и веќе на првиот натпревар од Првата кошаркарска лига по полагањето на испитот, во салата Тиволи ечеше: “кувари,кувари“…Некои знаеја,а други не – зошто одекнуваше ова ехо.Тоа нормално беше упатено кон „новопеечените“ готвачи, кои не само што немаа појма од работата, туку и кафеаната не знеја како да ја водат.
– Жив човек не влегуваше, – вели Лазо. Ние како маскоти седевме внатре, ама ќарот беше нула. Затоа набргу ја отстапивме на други,кои си ја знеаја работата и кафеаната постојано беше полна. Некогаш немаше и место каде да се седне. Сфативме дека за нас е само салата и кошарката, нам ни останаа само дипломите кои богами скапо ги плативме, а не знам дали и денеска имаат некаква вредност. Сепак,секој треба да си ја работи онаа работа за која е стручен. Нашите наследници во кафеаната очигледно беа стручни и знаеја како да го водат угостителскиот објект кој постојано беше полн со гости. Додека бевме ние газди – живо пиле невлегуваше!
Ете, попатно со нашиот најпопуларен кошаркарски тренер, во кариерата се случуваа и такви работи. Нема сомнение и тоа беше дел од неговиот имиџ, кој се карактеризираше со многу шармантни потези,како овој „пропаднатиот“со добивање готвачки дипломи!