Фотографот Артур Едвардс, кој го фотографира кралското семејство од 1977 година, вели дека му било ужасно на венчавката на принцот Хари и Меган Маркл во 2018 година во капелата Свети Џорџ во замокот Виндзор.
Тој вели дека Хари тој ден дополнително му ја отежнал работата. „Беше ужасно. Сега можам да ви кажам – тоа беше најлошата кралска веридба и венчавка на која некогаш сум работел. Затоа што Хари беше решен да нè држи подалеку што е можно повеќе“, рекол 83-годишниот Едвардс.
„Морав да правам сè со долги објективи. Имав објектив од 800 милиметри со кој ги фотографирав гостите кои доаѓаа. Фотографите кои тие ги ангажираа за работата беа поблиску. Едноставно беше невозможно да се направи добар кадар“, опишал тој.
„Катастрофа“
Освен тоа, Едвардс бил особено фрустриран кога младенците поминале во кочијата бидејќи не можел да го добие најдобриот агол. „И потоа поминаа покрај мене во кочијата и погледнаа на другата страна“, се присетил тој. „Тоа беше катастрофа за мене“.
„Дали тоа беше намерно? Сакаа ли да се чувствувате непосакувано?“, го прашал новинарот на „Sun“.
„Така се чувствував“, одговорил Едвардс. „Не сум само јас. Целиот британски печат беше лошо третиран на многу начини“, додал тој.