Најмалку 39 лице го загуби животот во неделата навечер, кога дошло до излетување од шините и судир на два брзи воза во близина на местото Адамуз, во јужна Шпанија. Информацијата ја потврдија полициски извори за агенцијата Ројтерс.
Железничкиот оператор Адиф објави дека возот Ирјо, кој превезувал 300 патници на линијата Малага-Мадрид, излетал од шините во 19:39 часот. Несреќата се случила на точките на влезот во Адамуз, каде што возот преминал на соседната пруга и удрил во седмиот и осмиот вагон на возот Алвија, кој се движел кон Хуелва. Причините за излетувањето од шините сè уште не се познати. Според официјални извори, две лица загинале во возот Ирјо, а три во возот Алвија.
Од кризниот центар велат дека не можеле да воспостават контакт со машиновозачот на возот Алвија.
Градоначалникот на Адамуз, Рафаел Морено, кој меѓу првите пристигнал на местото на несреќата со локалната полиција, ги опишал шокантните сцени.
– Видов патник згмечен како партал. Ние бевме првите што пристигнавме и имаше тело пресечено на половина. Но, немаше светлина, беше ноќ – рече Морено.
Тој додаде дека верува оти не станува збор за челен судир, туку за страничен судир, бидејќи не ги видел предните делови на возовите згмечени.
Новинарот на RTVE, Салвадор Хименез, кој бил во еден од возовите, рекол дека силен удар, кој звучел како земјотрес, го потресол вагонот. Потоа, патниците користеле чекани за да ги скршат прозорците и вратите за да излезат. Тој опишал часови „голема неизвесност“ додека чекале евакуација со автобус.
Итни служби, вклучувајќи пожарникари и неколку медицински екипи, се испратени на местото на настанот за да им помогнат на повредените и да ги евакуираат патниците. Патниците од двата воза се превезуваат со автобус до блиската општинска сала. Несреќата целосно го запре железничкиот сообраќај на линијата за брзи возови помеѓу Мадрид и Андалузија, додека остатокот од мрежата работи нормално.
Министерот за транспорт Оскар Пуенте ја следи ситуацијата од кризниот центар Ренфе во Мадрид. Шпанскиот премиер Педро Санчез изјави на платформата на социјалните медиуми X дека владата „соработува со властите и службите за итни случаи за да им помогне на патниците“. Претседателот на Андалузија, Хуанма Морено, исто така, изрази загриженост и потврди испраќање дополнителни служби за итни случаи на местото на настанот. Лидерот на опозициската партија Народна партија, Алберто Нуњез-Феихоо, исто така, изрази поддршка за жртвите и за нивните семејства.