Џилијан Лорен, познатата писателка и сопруга на басистот на бендот Везер, Скот Шрајнер, била повредена во полициска престрелка, соопшти полицијата во Лос Анџелес.
Инцидентот се случил кога сообраќајната полиција на државата Калифорнија побарала помош во потрагата по тројца осомничени за бегство од местото на несреќата кои избегале во станбениот комплекс Игл Рок.
При претресот на областа, во дворот на соседната куќа полицајците забележале жена вооружена со пиштол, која ја идентификувале како Џилијан Лорен.
Вперила пиштол кон полицијата
Полицијата во соопштението од 9 април соопштила: „Полицајците повеќе пати ѝ наредиле на жената да го фрли оружјето, но таа одбила. Потоа го вперила пиштолот кон полицајците, по што дошло до пукање“.
Според властите, Џилијан била погодена со истрели од огнено оружје, по што се повлекла во куќата. Брзата помош ја пренела во болница поради повреди кои не биле опасни по живот.
Понатамошната истрага утврдила дека Џилијан не била поврзана со сообраќајната несреќа што ја поттикнала потрагата и дека живеела во куќата каде што била видена. И покрај тоа, полицијата официјално ја обвинила за обид за убиство, а ѝ била одредена кауција од 1 милион долари, пренесе „E! News“.
Лорен наводно им рекла на полицајците дека едноставно се обидувала да го одбрани својот дом од осомничениот кој трчал низ населбата. На крајот и тој бил приведен.
Неодамна објавила дека се бори со ракот
Ова пукање се случило само еден месец откако Џилијан на Инстаграм открила дека имала „комплицирана операција“, без да открие детали, но наговестила дека се бори со ракот.
„Да, го имам она што започнува на буквата Р“, напишала таа покрај фотографијата од нејзиниот болнички кревет. „Благодарна сум за секој момент од извонредната и сочувствителна здравствена заштита што ја добивам. Им благодарам на сите неверојатни здравствени работници“, рекла тогаш Лорен.