Луксузните часовници од приватната колекција на легендата на Формула 1, Михаел Шумахер (57), достигнаа милионски цени на аукција во Женева. Во понеделникот, во аукциската куќа „Christie’s“ беа понудени пет ретки примероци од серијата со сериски број 92/99, кои беа продадени поединечно, заедно со оригиналните кутии.

Два модела од оваа серија особено предизвикаа високи понуди: „Tourbillon Souverain“ и „Chronomètre à Résonance“ од престижниот бренд „F. P. Journe“ достигнаа цена од по 1,53 милиони швајцарски франци (околу 1,66 милиони евра). Заедно, овие два луксузни часовника донесоа повеќе од 3,3 милиони евра. Тие беа претставени пред јавноста во 1999 и 2000 година, на врвот на славата на Шумахер, и не се единствените часовници што ги поседувал од понудата на еден од најпрестижните и најценетите производители на часовници во светот, со седиште во Женева.

Часовниците на „F. P. Journe“ се познати по тоа што нивните механизми се изработуваат во целост од 18-каратно розово злато, во многу мали серии.

Повод за аукцијата беше големата годишнина – точно три децении од легендарниот премин на Шумахер од Бенетон во Ферари. Ова не беше првата аукција, бидејќи истата аукциска куќа во Женева пред две години продаде осум часовници од колекцијата на Шумахер за околу четири милиони евра.

Веќе е продаден и Божиќниот подарок на Михаел

Тогаш беше продаден и скапоцениот „F. P. Journe Vagabondage 1“, луксузен рачен часовник изработен од платина, и таканаречен механизам „jump hour“. Циферблатот е целосно персонализиран – со светлоцрвена боја, знакот на Ферари, мотив на тркачка кацига и симболи што ги одбележуваат седумте освоени титули светски шампион во Формула 1.

Овој уникатен часовник му го подарил Жан Тод на Михаел Шумахер за Божиќ во 2004 година. Тод тогаш бил шеф на тимот на Ферари и еден од ретките пријатели што го посетиле Шумахер по страшната несреќа на скијање во 2013 година, по која тој повеќе не се појави во јавноста.

На вчерашната аукција во Женева учествувале купувачи од 66 земји, а вкупниот приход изнесувал околу 48 милиони швајцарски франци (речиси 52 милиони евра).