Д-р мед.сци. Маја Милованчева-Поповска
интернист-нефролог
ПЗУ Промедика Медикал Центар
Gilbert синдромот е благо пореметување каде неконјугираниот билирубин (жолт продукт во крвта) е повисок од нормално поради тоа што црниот дроб не може соодветно да го преработи. Билирубинот е продукт од распадот на старите црвени крвни зрнца.
Високиот билирубин (хипербилирубинемија) во крвта може да предизвика жолтица. Кожата и белките на очите се пожолтени.
3-7% од населението може да го има овој синдром, повеќе го има машкиот пол. Оваа состојба е наследна, генетска, оди по фамилии. Лицата имаат еден неисправен ген кој е одговорен за создавање на специфичен ензим (глукуронил-трансфераза) кој е потребен црниот дроб да го преработи билирубинот (од неконјугиран во конјугиран) и да го отстрани од крвта преку жолчката и дигестивниот систем. Лицата со овој синдром имаат пониско ниво на овој ензим. Нема други ризик фактори за појава на синдромот.
Многу лица немаат никакви симптоми и не знаат дека го имаат. Во околу 30% случаи се открива случајно, со крвните анализи.
Жолтицата е најчест знак, ретко некои особи имаат замор, болка во стомак, вртоглавица. Симптомите типично се јавуваат во одредени ситуации кога расте нивото на билирубин во крвта: болест, стрес, дехидратација, преголем физички напор (вежбање), гладување, менструација.
Состојбата не бара третман, нема компликации, минува сама од себе.
Не може да се превенира бидејќи генетски се пренесува, оди по фамилии.