Целата јавност во Мароко гледа и навива за среќен крај на спасувачката операција во близина на градот Шефшауен, каде петгодишно момче паднало во бунар.
Детето, идентификувано од локалните медиуми како петгодишно момче по име Рајан, наводно си играло во близина на бунарот во градот Тамруту, 100 километри од Шефшауен.
Се верува дека Рајан паднал на длабочина од околу 32 метри низ тесниот отвор на бунарот. Спасувачките операции, предводени од Дирекцијата за цивилна заштита на Мароко, траат од вторникот навечер.
И покрај опасниот пад, снимката од камерата спуштена во бунарот покажува дека момчето останало живо и свесно, иако изгледало дека има полесни повреди на главата.
Локалните медиуми објавија дека властите на провинцијата ги следат обидите за спасување и дека во операцијата сега се вклучени десетици полицајци, помошни сили, кралската жандармерија и службеници за цивилна заштита.
Видеото од спасувањето го погледнале и илјадници луѓе на социјалните мрежи, а на лице место се собрала поголема група набљудувачи.
Мохамед Јасин Ел Куахаби, претседател на Здружението за спелеолошки и планински активности, помага во спасувањето и за Би-Би-Си изјавил дека напорите за спасување се попречени поради малата широчина на бунарот.
Тој додаде дека неколкуте обиди на локалните волонтери да му пријдат на детето, веќе биле неуспешни.
„Проблемот со ова спасување е што дијаметарот на дупката е многу, многу мал, околу 25 см“, рече Ел Куахаби. „На длабочина од 28 метри станува уште потесен, па не можевме да го достигнеме.“
Сликите од местото на настанот покажуваат пет булдожери кои копаат голема површина паралелно со надворешната оска на бунарот за да се обидат да ја заобиколат тесната структура.
Досега достигнале на длабочина од 19 метри, а Ел Куахаби за Би-Би-Си изјавил дека сега само така спасувачите ќе можат да стигнат до Рајан.
Но, властите се загрижени дека секој упад во бунарот би можел случајно да го повреди петгодишното дете.
Спасувачите во бунарот спуштиле маска со кислород, храна и вода.
На лице место има и лекарска екипа, подготвена да го спасува животот на момчето, објави Би-Би-Си.