Новопечените младенци Џон и Филис Кук се венчале во еден старечки дом во Охајо. Но, тоа и не би било толку необично доколку Џон не e ветеран од Втората светска војна кој пред некој ден наполнил 100 години, а Филис е три години постара од него – таа на 8-ми август наполнила 103 години. Долговечноста во семејството на Филис е генетска со оглед на тоа дека и нејзината мајка живеела 106 години.
Заљубените се запознале во 2018 година, но во последните неколку месеци развиле подлабока врска. Како посветена христијанка, Филис одлучила дека најдобро е да стапат во брак и да ја крунисаат љубовта на тој начин.
Минатата недела тие одлучиле да се венчаат и самостојно заминале до општината по дозвола.
“Не планиравме да се венчаме во дом, но од општината нѝ ја предложија таа идеја. Реков: Добро, ајде да завршиме со тоа”, раскажал Џон за “CNN”.
Меѓутоа, тоа не било изненадна одлука – парот се забавувал една година пред да застане на “лудиот камен”.
“Искрено да ви кажам, ние се заљубивме еден во друг. Знам дека мислите дека тоа е малку несоодветно за некој на наша возраст, но ние едноставно се заљубивме”, изјавила Филис.
И Џон и Филис претходно биле два пати во брак, а својата трета среќа во љубовта ја пронашле еден со друг.
“Компатибилни сме на многу начини и многу уживаме во заедничкото друштво”, вели Џон.
Деновите ги поминуваат уживајќи во оброците, седејќи на сонце и возејќи се со мобилни скутери. Исто така, сакаат секој да има свој мир.
“Секој има свој стан – тој е горе, јас сум во станот под него”, рекла Филис.
Парот планира да ужива и да поминува што повеќе време заедно.
