Канадскиот премиер Џастин Трудо се извини поради шминкањето на неговото лице со темна боја во 2001-ва година, откако фотографијата се појави на интернет во пресрет на изборите во Канада. Фотографијата на 29-годишниот Трудо со лицето кое што го затемнил со шминка е голем удар за премиерот кој често говори за потребата за борба против расната дицкриминација и кој во својот кабинет има тројца истакнати министри со индиско потекло.
„Требаше тогаш да знам повеќе, но не знаев. Длабоко жалам поради тоа што го сторив“, изјави Трудо пред новинарите откако „Тајм“ ја објави спорната фотографија.
„Го облеков костимот на Аладин и ставив шминка. Не требаше да го направам тоа“, изјави Трудо за фотографијата на која се гледа како носи турбан и бела наметка, додека неговото лице е нашминкано за да биде црномурест.
