Од вечерва шефицата на СЈО, Катица Јанева е во истражниот затвор “Скопје” во Шуто Оризари. Судија на претходна постапка ѝ определи 30 дневен притвор во истрагата за случајот “Рекет” како третоосомничена. Таа има право на жалба преку нејзините адвокати до кривичниот совет.
Притворот го побара Обвинителството за гонење организиран криминал и корупција. Јанева е обвинета дека ја злоупотребила службената положба и овластување и влијаела за поповолна позиција на осомничениот Орце Камчев во предметот “Империја”.
Инаку, на Јанева и е дозволено да присуствува на погребот на нејзината мајка, која почина утринава. Таа утре во полициска придружба ќе присуствува на погребот.
Во притвор за истиот случај веќе втор месец се осомничените Бојан Јовановски и Зоран Милевски.