Семејството, колегите, пријатели денеска за последен пат се простија од актерката Билјана Беличанец. На комеморацијата во Драмскиот театар во Скопје присуствуваа сопругот Сашо Миленковски, нејзините две дечиња, како и голем број од актерите, режисерите од театрите низ земјава.
Дејан Лилиќ рече дека е премногу тешко што истата таа сцена сга ја испраќа во вечноста.
– Не е фер. Требаше уште мнгоу да работиме заедно, јас, ти и твојата весела дружина. Билјана, никогаш нема да бидеш минато, секогаш ќе бидеш со нас во сегашноста. Оние што добро те познаваат, знаат дека си голем човек со огромно срце и душа и за себе и за сите нас. Ти не глумеше на сцената, ти живееше овде, ѕвер од актер и ангел од човек – рече Лилиќ низ солзи.
Драган Спасов – Дац како еден од колегите со кого често настапуваат партнерски на сцената рече:
„Нè остави збунети и во болка, нè остави да замислуваме што уште можеше да направиш овде. Ти едноставно на сцената беше Билјана Беличанец. Ти на оваа сцена беше мојата Сара, Цвета, Сузана, Билјана Беличанец. Лука и Мона, да се гордеете со мајка ви оти имате силна причина за тоа“, рече Дац.
Актерката Снежана Коневска – Руси се потсети на нивните приватни дружби
– Додека мене моливот со идеи ми стана тап, ти имаше безброј идеи во себе. Биле, ќе те чекам…или барем ти чекај ме мене – рече Коневска – Руси.
Од гледалиштето на сцената на која одигра најголем број улоги и претстави, актерката Билјана Беличанец го доби најдолгиот и најгласниот аплауз.