Најпопуларниот водител во поранешната Југославија, Оливер Млакар, вчера го прослави 91-от роденден.
Зад себе има 55-годишна кариера и сè уште повремено работи на одредени проекти, но на телевизија не би сакал да се врати, дури и да му понудат добар проект и хонорар, бидејќи верува дека дал свој придонес во телевизијата.
Оливер денес живее повлечено на село во близина на Самобор со сопругата Дуња, со која има две ќерки, а во брак се повеќе од 60 години.
Млакар раскажал дека тајната на нивниот успешен брак е почитувањето и истакнал дека никогаш не ја изневерил својата сопруга и дека е многу посветен на семејството.
– Имав среќа што наидов на квалитетна и чесна личност. Во бракот, како и во секој друг однос, треба да бидете чесни. Ако го почитувате вашиот партнер, семејството ќе биде хармонично. Занесот и заљубеноста траат некое време, но тоа неизбежно бледее. Потоа, треба да останете поштени и верни, тогаш и семејството ќе трае долго. Мојата сопруга Дуња имаше многу разбирање за мене, а јас ѝ дадов многу причини за тоа. Останав приврзан за семејството, никогаш не бев склон кон излети. Секогаш мислев на неа и на децата. Тоа секогаш беше најважното нешто за мене – рекол Млакар за хрватско „Стори“ во таа пригода.