Иако многумина веруваат дека животот го достигнува врвот во 20-тите години, ново истражување покажува поинаква слика. Според резултатите, луѓето најчесто се чувствуваат најздрави и најсреќни околу 47-тата година.
Истражувањето, спроведено меѓу 2.000 Британци, покажало дека токму крајот на четириесеттите години се поврзува со поголема самодоверба, подобро разбирање на сопственото тело и помал притисок од мислењето на другите.
Експертите објаснуваат дека со годините луѓето почнуваат повеќе да се грижат за тоа како се чувствуваат, а не само како изгледаат. Многумина во овој период прават поздрави избори, помалку излегуваат, поретко пијат алкохол и повеќе внимаваат на исхраната и одморот.
Дополнително, дел од испитаниците велат дека децата или внуците ги мотивираат да останат активни, што позитивно влијае врз физичката и менталната состојба.
Сепак, стручњаците предупредуваат дека грижата за здравјето не треба да се одложува. Ако подоцнежните години носат поголема зрелост и мир, вистинското време за здрави навики е секогаш сега.