Д-р мед.сци. Маја Милованчева-Поповска
интернист-нефролог
ПЗУ Зегин Интермедика
Вртоглавицата, вертиго, се одликува со лажно чувство на движење, вртење, кога сме во мирување. Жените се поподложни од мажите. Може да доведе до постојана непријатност, вознемиреност, потешко извршување на секојдневните активности и значително да влијае на квалитетот на живот.
Вртоглавицата е симптом на некоја болест. Може да е: периферна или централна (проблеми со централниот нервен систем).
Периферната вртоглавица (80% случаи) е последица на проблеми со внатрешното уво каде се наоѓа вестибуларниот апарат кој е одговорен за одржување на рамнотежа и просторна ориентација. Преку вестибуларниот нерв континуирано се испраќаат информации за движењата и положбата на главата до мозокот. Нарушувањата се:
– Бенигна пароксизмална позициона вртоглавица – најчеста причина, се активира во одредени положби на главата и испраќа лажни сигнали до мозокот.
– Мениерова болест – абнормално производство на течност во внатрешното уво, се зголемува притисокот, влијае и на слухот
– Лабиринтис – воспаление на лабиринтот, дел од внатрешното уво, поради вирусна инфекција, влијае на рамнотежата и слухот.
– Воспаление на вестибуларниот нерв – нарушен е протокот на информации од внатрешното уво до мозокот.
– Акустичен невром – бениген тумор на нерв кој прави притисок и предизвикува вртоглавица, губење на слух, тинитус, главоболка.
– Централна вртоглавица – поретка, поради оштетување или дисфункција на малиот мозок, центарот за рамнотежа во мозокот. Причини:
– Вестбуларна мигрена – најчеста причина за спонтани повторливи епизоди на вртоглавица со или без главоболка, придружени со осетливост на светлина или звук
– Мозочен удар – во мозочното стебло или малиот мозок
– Мултиплекс склероза – хронично заболување кое влијае на централниот нервен систем
– Травматска повреда или потрес на мозокот
– Тумори на мозок или ‘рбетен мозок
Третманот зависи од дијагнозата. Повеќето случаи на вртоглавица се решаваат сами за кратко време. За бенигната позициона вртоглавица се препорачува физикална терапија со специфични движења на главата, маневри.
Терапија за рехабилитација на вестибуларниот систем дизајнирана е да ублажи широк спектар на нарушувања на рамнотежата. Работи на принц ип на невропластичност, способност на мозокот да формира нови нервни патишта и да се прилагоди на промените. Со терапијата се компензира дисфункцијата на вестибуларниот систем, се прави адаптација и навикнување. Вклучува учење да се координираат движењата на очите и главата, вештини за одење и учење за справување со вознемирувачки ситуации.
Превентивни мерки за намалување на епизодите на вртогралица:
– спиење со малку крената глава
– по будење, полека станување од кревет, седете на кревет минута две пред да се станете
– избегнувајте да се наведнувате, со главата надоле
– избегнувајте истегнување на вратот со главата нагоре (за да дофатите нешто)
– избегнувајте нагли движења на главата при секојдневните задачи
– додатоци на исхрана: гинко билоба, јаболков оцет со мед, чај од ѓумбир, етерични масла од лимон и лаванда, магнезиум
– останете хидрирани