Официјалната Фејсбук страница на бендот „Парни ваљак“ го откри точниот датум на погребот на фронтменот, познатиот Аки Рахимовски, кој ненадејно почина оваа сабота на 67-годишна возраст.
Како што беше претходно најавено, Аки ќе биде погребан во Загреб, а деталите од последното збогување се напишани во објавата.
– Последното збогување на Аки Рахимовски ќе се одржи во четврток на 27 јануари во 15 часот на загрепски Мирогој во Алејата на великаните, меѓу семејството и пријателите. Со оглед на актуелните епидемиолошки мерки ги замолуваме сите кои го сакале Аки и сакаат да му оддадат почит, тоа да го сторат од вторник, 25 јануари кај Бунарот на животот пред загрепскиот Хрватски народен театар, каде ќе може да се донесат цвеќиња и да се запалат свеќи.
Официјалната комеморација ќе се одржи во петок, на 28 јануари во 11 часот, во малата сала на Ватрослав Лисински во Загреб, за најтесниот круг на колеги и пријатели.