Зоран Михајлов
– Во 1953 година Сотировски по втопрпат стана првак на Македонија, со супериорни игри просто се прошета на првенството .
-Третиот и последен триумф ,следната година,беше многу потежок ,а дуелот со Софревски беше нешто посебно
Очигледно патот до првата титула беше брз , неверојатен, за еден млад шахист со неполни 20 години. Тоа беше период кога македонските шахисти учествуваа и на квалификационите турнири за југословенското првенство. Редовен учесник, според резултатите и рејтингот беше и Благоја Сотировски-Џагуре.Тој на полуфиналниот турнир во Чачак беше најуспешен. Доживеа само еден пораз и тоа во последното коло од Булат, а беше подобар од шаховските асови какви што беа Пуц, Недељковиќ, Дамјановиќ и Николац. Пласманот и бројот на освоените поени на овој турнир му ја донесоа и титулата кандидат-мајстор, што за тој период беше нешто големо, нешто за што мечтееше секој млад шахист. Претходно во 1950 година на младинското првенство на Југославија го освои 6-тото место . Тоа беше голем успех, кога се знае дека поранешната држава беше шаховска велесила, која редовно се враќаше со медали од големите приредби.
Вториот лесен,третиот тежок триумф на првенството на Македонија
За да ја потврди својата класа и да покаже дека навистина е роден за шахот –Џагуре освојува уште две титули, со што влезе во македонската шаховска историја.
Еве што вели за тој период и за настапите на републичките првенства:
– Во 1953 година се прошетав на првенството и без големи напори стигнав до втората титула,додека треттата беше многу потешко освоена.На тоа првенство во 1954 година со Јован Софревски одигравме една супер-партија,која посебно ми остана во сеќавање, не само мене, туку на сите оние што ја следеа.Тоа беше шаховски дуел за паметење,остар,со пресврти и со неочекувани потези.
Во таа партија имаше се што можеше да посакаат вљубениците во древната игра. Овој дуел беше посебен…
Интересно е дека во 1952 година, Џагуре ја загуби титулата по поразот во последното коло од Павле Бидев.
-Тогаш го прашав дали се сеќава на мене од средношколските денови. Најнапред чудно ме погледна, а кога му кажав дека јас бев оној ученик од последната клупа, кој воопшто не се интересираше за шахот и ми се закани дека ќе ми стави двојка по фискултура, не можеше да поверува. Тоа беше разбирливо зашто пред неговите очи минаа илјадници ученици и стотици шахисти.Тој не мораше да ги знае сите, а тие пак него многу добро го знаеја и почитуваа. Беше добар педагог, а на многу шахисти нивни учител. И јас многу го почитував. Бидев треба да остане запаметен во македионската шаховска историја – не само како прв републички првак, туку како човек кој зад себе остави големо дело поткрепено со огромна шаховска литература, која беше од непроценливо значење за созревањето на следните генерации.
Софревски вистински лидер
Најголемиот екипен успех ШК Студент, чиј член беше и Благоја Сотировски, го имаше во Купот на Маршал Тито одигран во 1961 година во Порторож. Таму екипата која ја предводеше Јован Софревски го освои второто место и за малку го испушти драгоцениот пехар.
– Софре беше вистински лидер. Тој ги имаше сите партии на противниците, имаше слика за секој нив. Многу се занимаваше со теоријата и знаеше за секој шахист која му е добрата, а која послабата страна. Затоа, неговите совети пред настапите во секое коло беа драгоцени. Не само со мене, туку со сите од тимот дискутираше за она што не очекува, за тоа на каков противник налетуваме и ни укажуваше како треба да се однесуваме и како да ја развиваме играта – од што да се чуваме и во критичните моменти, кои потези да ги одиграме. Беше тоа прекрасно време, незаборавно. Штета е што во ова финале на Купот не стигнавме до трофејот. Но, тука имаше и други игри. Во последното коло се сретнаа две екипи од Словенија-Љубљана и Марибор. На љубљанчаните им беше потребна победа за првото место, а мариборчаните немаа шанси за висок пласман, па така лесно влегоа во мечот, без посебно залагање и очекувано загубија. Сите знаевме зошто е тоа така,но ете и шахот, како впрочем и другите спортови, не беше имун на таквите да речам наместени работи. Потоа, дојде поплавата во 1962 година, која од шаховскиот дом ги однесе сите книги со потезите од најзначајните партии, потоа удри и земјотресот, па така многу нешта не изгледаа како порано. Друштвото почна да се растура, а јас својот пат го продолжив во Америка. Таму станав член на клубот Капабланка од Вашингтон, за кој настапував на првата табла на екипното првенство на САД во периодот од 1970 до 1972 година. Во меѓувреме, во конкуренција на 600 шахисти станав шампион на Вашингтон.На отвореното првенство на американската метропола настапи и прославениот шахист Кавалек, кој се пласираше зад мене.
Благоја Сотировски потоа се враќа во Македонија, но Америка го влече и натаму, па тој по втор пат заминува пртеку Атлентикот. И овој пат во 1985 година беше најдобриот шахист на Капабланка и ги бранеше боите на клубот на првата табла.
СО ШАХОТ ВО ЕЛИТАТА
Во 1969 година,како завршен шумарски инженер специјалист за хортикултура,бидејќи немав работа заинав во САД.
-Таму шахот многу ми помогна да стигнам до елитата и во САД. Во Вашингтон освоив еден турнир, кој позитивно се одрази и на мојата работа како стручњак за хортикултура. Во фирмата доаѓаа многу познати личности, генерали, адмирали, конгресмени, а и најпознатиот американски спортски коментатор Џорџ Мајкл. Сите ги бараа моите услуги за уредување на нивните дворови и тераси. Задоволни беа и моите претпоставени, па можам да кажам дека убаво поминав.
ХОРТИ ЕКСПЕРТ НЕГОВО ДЕЛО
Џагуре толку многу беше навлезен во светот на хортикултурата, така што со еден негов партнер го отворија познатиот бонсаиј центар наречен Хорти-експерт, лоциран во Градскиот парк во непосредна близина на хотелот Александар Палас. Ова е прекрасно катче во кое секојдневно наминуваат по десетици посетители. Шаховскиот шампион ја продолжува својата работа во струката, во која исто како во шахот е вистински шампион.
ЧОВЕК СО НЕВЕРОЈАТНА МЕМОРИЈА
Со името на Благоја Сотировски-Џагуре се врзани многу нешта од животот во оваа наша Македонија. Беше трикратен шаховски првак, беше 6-ти во поранешна Југославија, екипно со ШК Студент беше втор во Купот на Маршал Тито 1961 година, беше шампион по меморија и во емисијата на Радио Скопје ,,Покажи што знаеш,,.
– Секоја недела на Радио Скопје,во вечерните часови одеше емисијата “Покажи што знаеш“, не потсетува на времето од пред 50-сеттина и повеќе години Џагуре. Во неа покрај другите работи врзани со проверка на знаењето имаше и една рубрика , наречена “меморија“, во која по ист редослед натпреварувачот требаше да ги повторува имињата на држави, градови, географски поими, познати личности и слично. По елиминацијата на моите ривали, останав уште јас да ја доиграм играта. А,богами и наградата беше голема – за секое повторено име, се разбира според правилата на играта , се добиваше награда и до 1.000 динари. Во финалната рунда , водителот Митко Данаилов, кој заедно со Бранка Станковска, ја водеше емисијата по 40-сеттиот повторен збор, во кој не се доискажав туку само ја изговорив буквата Л …и веднаш се повлеков и го кажав името на зборот што следуваше, веднаш даде знак за стоп! Се подуплаши да не ја испразнам касата на популарниот благајник на Радио Скопје – Аџијата, па така ме прекина и тука беше крајот на играта меморија. Инаку,во целата сезона на емисијата јас бев натпреварувачот со најдобар резултат.
Во една прилика,тоа го потврдија и пријателите на Џагуре, тренирајќи за играта меморија повторил едноподруго – без грешка дури 200 зборови. Ова е богами, верувам и вие ќе се согласите, за Гинис.