Специјално за улица.мк од Банско: Зоран Михајлов
-Американката по стартната победа во спустот беше прва и во денешниот супер велеслалом
Михаела Шифрин денеска со триумфот во супервелеслаломот во Банско ја извојува 66-тата победа во Светскиот куп.Таа со новите 100 поени се зацврсти на првото место во генералниот пласман со 1.225 бодови. Втора и натаму во генералниот пласман е Федерика Брињоне со 885 бодови,која денеска немаше среќа и на 7 врати до целта падна .Инаку до овој несреќен момент таа беше со најдобро време и по освоеното второ и трето место во претходните два спуста можеше да дојде и до победа.Но,во ваквите брзи трки никогаш ништо не може да се прогнозира.
Така,по трите натпреварувачки дена во Банско останува констатаацијата дека почетокот и крајот и припаднаа на Американката Шифрин. Таа денеска во суперџито делуваше стабилно и не направи ниту една грешка. Со голема умешност минуваше низ вратите и беше уживање да се гледа. На крајот беше наградена со громогласен аплауз од гледачите,кои во сите три дена ја исполнуваа трибината.
Денеска Шифрин постигна резултат од 1.10,88 минути и за 29 стотинки беше побрза од Италијанката Марта Басино,која и вчера во спустот беше на истата позиција. Трета беше Швајцарката Лара Гут-Бехрами,која заостануваше зад победничката за 70 стотинки.
Шифрин, со денешната победа, го презеде водството и во вкупниот пласман во супервелеслалом. Сега е на чело со 186 бода пред Корине Шутер која има 150 бода.
Така,со доминација на Михаела Шифрин минаа трите трки за Светскиот куп на одлично подготвената патека на Пирин во Банско.
