Почина иранскиот пратеник Мохамад Али Рамазани Дастак кој беше заразен од коронавирус, пренесува државна новинска агенција. Тој неодамна беше избран во иранскиот парламент, а позитивниот тест за коронавирус пристигнал пред неколку дена.
Инаку, бројот на заболени од коронавирусот во светот се приближува до бројка од 85.000, од кои досега има нешто повеќе од 2.900 смртни случаи. Во Јужна Кореја се потврдени 594 случаи на коронавирус, што е најголем пораст на бројот на инфицирани во еден ден.
Со тоа вкупниот број на заразени во Јужна Кореја пораснал на 3.150, додека бројот на починати е 17, пренесува “BBC” и додава дека во таа земја има најмногу потврдени случаи надвор од Кина, каде започнала епидемијата.
Во Италија вчера починаа уште 4 лица, со што вкупниот број на жртви се искачи на 21, а порасна и бројот на заразени од 650 на 889. Епидемијата на коронавирусот во оваа земја започна минатата недела во северните региони Ломбардија и Венето.