Ерик Клептон е едно од најзвучните имиња на музичката сцена.  Општо е познат неговиот бурен живот на рок-ѕвезда, кој и самиот Клептон го опишал во својата автобиографија. Неговите проблеми со алкохолот и дрогата ги полнеа таблоидите, а потекнувале од несигурноста која ја носел од најраната младост и која го следеше долго време.

Она што исто така беше во фокусот беше и неговиот љубовен живот, а сите знаат дека првата голема љубов на Ерик беше Пети Бојд, сопругата на неговиот добар пријател Џорџ Харисон, која подоцна ќе стане негова сопруга.

Му требало долго време да се справи со своите пороци, а на убедување на неговите пријатели и сопругата, во 1982 година заминал на рехабилитација во Минесота, каде што ќе остане речиси една година. Закрепнат, се враќа и повторно почнува да работи со полна пареа. И токму кога се чинеше дека конечно сè е на свое место, гитаристот влегува во врска со манекенката Ивон Кели, со која ќе ја добие ќерката Рут.

Трагедијата која го одбележа неговиот живот

По две години, тој доби уште едно дете со Лори Дел Санто, синот Конор. Тој не бил заљубен во Лори, но кога таа го родила Конор, Ерик ѝ рекол дека таа е жената на неговиот живот.

Најпознатата приказна за Клептон е секако приказната за неговата најголема трагедија.

Имено, во март 1991 година, музичарот го разбудил ѕвонењето на телефонот во неговиот стан во Њујорк. Кога се јавил, следувал крикот на неговата љубовница Лори, кој му ја заледил крвта. Конор, кој тогаш имал само 4 години, случајно паднал од прозорец од 53-от кат. Болката што ја чувствувал Ерик била страшна. Следниот ден морал да оди да го идентификува телото на своето дете, а според неговата приказна, и покрај ужасните повреди на телото, лицето на Конор за чудо останало недопрено. Тој изгледал како да спие.

Сета своја болка и тага Клептон ја искажа во песната „Tears In Heaven“ која во тој период ја напиша и му ја посвети на Конор. Со оваа композиција освои дури 6 Греми награди, кои биле само слаба утеха.

Денес Клептон е далеку од имиџот на порочна ѕвезда, а во 1999 година ја запозна Мелија Мекенери, жена која засекогаш ќе го промени неговиот поглед на животот и светот.

„Таа ми помогна да ја истресам прашината од себе“, напиша Ерик во својата автобиографија.

Парот има 3 ќерки, а познатиот гитарист целосно ја прифатил улогата на татко, но и денес чувствува неопислива тага поради смртта на синот.