Најмалку двајца убиени и пет повредени во нападот со нож во воз во Германија

На железничката станица Брокштет во Германија, непознат напаѓач со нож нападнал патници, при што се убиени најмалку двајца луѓе.

Како што јави РТЛ, според првичните информации, покрај загинатите, извесен број патници се тешко повредени. Неофицијално, во болница се пренесени петмина ранети.

Портпаролот на полицијата во германската сојузна покраина Шлезвиг-Холштајн потврди дека имало напад со нож и дека има жртви, но не даде прецизни податоци за нивниот број. Осомничениот е уапсен.

Во тек е полициска истрага на железничката станица во Брокштет, објавија на Твитер од германската железница Дојче Бан.

„Шпигел“ пренесува дека нападот се случил околу 15 часот, пред возот да стигне до станицата во Брокштет. Други информации за повредените и за нападот засега нема.