Српскиот државјанин од Прешево, Љуљзим Сулејмани (26) кој ја преживеа несреќата на автопатот во Бугарија, во која загинаа 45 лица, рече дека прво слушнал тресок, а потоа експлозија, која најверојатно дошла од гумите, по што настанал пожарот, кој брзо се раширил од предниот дел на автобусот.
„Автобусот во движење удри од десната страна во тротоарот. Тркалата пукнаа и почна да избувнува пожар и имаше многу чад. Потоа автобусот се движеше 20 метри лево. И сам застана. Луѓето почнаа да повраќаат, да врескаат како во хорор филмови. Успеав да избегам некако. Подоцна го зедов чеканот во автобусот и го скршив стаклото. Ја извадив свршеницата и уште пет лица, изјави Сулејмани за ТВ Клан.
Инаку, несреќата се случи ноќта меѓу понеделникот и вторникот, околу три часот по полноќ, кога автобус со македонски регистарски таблички на компанијата „Беса Транс“ нагло свртел, ја пробил банкината на автопатот Струма и се запалил.
На списокот на повредени се шест возрасни и една 17-годишна девојка. Сите имаат изгореници, едно лице има и скршеница на бутната коска, но сите се надвор од животна опасност и се очекува да закрепнат, соопштија бугарските лекари.