Каскадерката Девин ЛаБела (34) поднесе тужба во Лос Анџелес против продуцентската куќа „Териториј Пикчрс“ и режисерот на филмот „Хоризонт 2“, Кевин Костнер, обвинувајќи ги за сексуално вознемирување, создавање непријателска работна средина и нанесување емоционална траума. Според наводите во тужбата, ЛаБела била ангажирана како главна каскадерка за актерката Ела Хант и снимала физички напорни сцени наместо неа. Првично, сè одело според планот, но на 2 мај 2023 година, на снимањето во Јута, работите се промениле. Според тужбата, Кевин Костнер изненадно побарал снимање нова сцена – насилна сцена која не била претходно планирана или најавена.
Во спорната сцена, актерот Роџер Ивенс требало да симулира сексуален напад врз жена. Откако дознала за сцената, актерката Ела Хант одбила да учествува и го напуштила сетот. ЛаБела тврди дека не ѝ било кажано за промената и не знаела дека треба да ја замени Хант, ниту дека сцената содржи сексуално насилство. Влегла во снимање неинформирана и неподготвена, без присуство на координатор за интимни сцени – нешто што е задолжително според правилата на синдикатот SAG-AFTRA.
Таа тврди дека сцената започнала без јасна најава од страна на режисерот – немало „акција“ или „стоп“, што дополнително ја збунувало. Според тужбата, присутни биле неколку набљудувачи и продуценти кои ја следеле сцената преку монитори.
По снимањето, ЛаБела се чувствувала засрамено, шокирано и понижено. Иако се обидела да разговара за тоа со координаторите на каскадерите на вечера, наместо поддршка, добила критика дека претходно не се пожалила. Правниот тим на Кевин Костнер го отфрли тврдењето како неосновано. Неговиот адвокат, Марти Сингер, изјави дека ЛаБела била свесна за сцената и дури и сигнализирала дека е спремна да ја сними. Додаде и дека таа била во „добро расположение“ по снимањето и не искажала загриженост.
Меѓутоа, според тужбата, денот по инцидентот, ЛаБела го информирала координаторот за интимност за тоа што се случило. Во деновите што следеле, таа доживеала напади на плачење и подоцна започнала терапија за справување со последиците – флешбекови, нарушен сон, анксиозност и страв од интимност.
По жалбата, таа не била повикана да работи на третото продолжение на филмот „Хоризонт“, ниту на други проекти од истиот координатор, што според неа е форма на одмазда. Тужбата наведува неколку точки: сексуална дискриминација, вознемирување, создавање непријателска работна средина, одмазда и намерно нанесување емоционална болка.
ЛаБела бара отштета, задолжителна обука за сексуално вознемирување за обвинетите, ангажирање координатори за интимност на сите идни продукции, како и јавно извинување. Оваа тужба повторно ги отвора прашањата за безбедноста на сетовите, правото на информираност на актерите и каскадерите, и потребата за почитување на професионалните стандарди во филмската индустрија.