Селекторот на македонската фудбалска репрезентација, Игор Ангеловски, во денешното интервју за утринскиот брифинг на „Слободен печат“ откри дека настапот на Евро 2021 нема да биде само протоколарен, туку со цел да се остави печат односно да се мине групната фаза од ова натпреварување.
„Би сакал завчерашниот успех да биде само мотив за уште подобри партии на Македонија, а воедно верувам дека ќе се покажеме во најдобро светло. Германија ја победивме исто како што се спротивставуваме на секој противник – со тимска игра, тимот беше тој кој што победи, а тимот беше предводен од кој друг ако не од Горан Пандев. Германија да ја победиш, но и во сите статистички податоци да ја победиш, навистина има место за задоволство кај еден човек што верува во нив уште од првиот ден. Момците ме направија многу среќен во изминативе пет години, круна беше пласматанот на ЕП, а ова беше налик на тоа. Ова е победа за нашиот народ. Среќен сум што во нашата земја владее еуфорија по победата, но не сакам еуфоријата да биде присутна во нашата соблекувална. Нашата цел е да ја поминеме групната фаза на ЕП, тоа им го кажав на играчите уште пред дуелот со Германија“, вели Ангеловски и додава:
“Пандев е суво злато. Кога Пандев говори за фудбал останатите треба само да молчат. Среќен сум што имам можност и чест да работам со таков човек“.
Игор Ангеловски има само шестмесечен договор кој не му гарантира дека ќе ги продолжи квалификациите за следниот Мундијал.
„Не би сакал да зборувам за договорот, треба да ги прашате другите (мисли на ФФМ – н.з.). Јас максимално професионално ја работам својата задача. Ова е моја репрезентација и секако дека работат емоциите. Јас сум Македонец и го сакам најдоброто за нас, како што почнав од првиот ден, така ќе се трудам до последниот ден. Еден Јоаким Лев пред натпреварот изјави дека Македонија е премачкана со сите бои и дека ова е плод на петгодишна успешна работа. Таков стратег ви дава пофалби за работата, за мене нема поубав комплимент, а останатите нека размислат што значи Ангеловски за оваа репрезентација“, заврши селекторот.