Британскиот јавен сервис Би-Би-Си се извини откако во петокот емитуваше интервју со човек кој лажно се претстави како Кори Букер, американски сенатор од редовите на демократите.
Би-Би-Си на својата веб-страница објави дека интервјуто со лажниот сенатор Букер е емитувано во петокот, 26 февруари, и дека повеќе не се емитува.
– Во нашата радио програма Newshour во петокот, еден човек кој тврдеше дека е сенаторот Кори Букер беше интервјуиран во, како што се чини, намерна измама – објави Би-Би-Си во објава што тој ја нарече исправка и извинување.
Британскиот јавен сервис додава дека тој му се извинил на сенаторот Букер.
– Истражуваме како настанала грешката, за да се осигураме дека нема да се повтори – стои во соопштението.
Според американскиот портал „Хил“, Би-Би-Си одби да коментира како се случил инцидентот или кога било договорено интервју со лажниот политичар.
Ова не е прв пат измамници да успеат да се појават во информативни емисии, наведува Хил.