Ретко Lamborghini Miura S помина неверојатни четириесет години скриено во дневната соба во една куќа во Њујорк.
Автомобилот, кој бил купен во осумдесеттите години за само 10.000 долари, денес вреди повеќе од милион долари, а за да може да го извади од куќата, сопственикот морал да го сруши ѕидот, пишува Carscoops.
Кога се појави пред речиси шест децении, Lamborghini Miura не само што го привлече вниманието, туку и го редефинираше концептот на супер спортски автомобил. Како прв модел на Ламборџини со средно поставен V12 мотор, тој ги постави темелите за сите идни егзотични автомобили и со текот на времето стана еден од најбараните колекционерски предмети во светот.
Откритието на скриен бисер
Приказната за овој автомобил дојде до јавноста благодарение на емисијата „Extreme Detailing“ на Discovery Channel. Водителот Лари Косила добил дојава за скриен бисер и отишол да го провери кај брокерот за егзотични автомобили Барет. По пристигнувањето во домот на сопственикот, ја пронашле Миурата паркирана меѓу мебелот, во климатизирана средина што ја штитела од суровите њујоршки зими и ја зачувала со децении.
Идентификувана е како P400 S обоена во Лучи Дел Боско, длабока метална нијанса што, според достапните информации, се наоѓа само на три примероци од Серија II. Соодветните броеви на шасијата и моторот ја потврдија автентичноста на автомобилот, дополнително зголемувајќи ја неговата вредност и привлечност за сериозни колекционери.
Погледнете ја приказната во видеото, по 10-тата минута
Рушење на ѕидот
Извлекувањето на автомобилот од дневната соба беше доста тежок потфат. Беше потребно да се сруши ѕидот што ја одделува дневната соба од гаражата. Но, дури и тогаш патот не беше слободен. Во него се наоѓаше уште еден дел од италијанската автомобилска историја – првата генерација на Maserati Quattroporte од 1960-тите. Се чини дека сопственикот имал фин вкус за класичен италијански дизајн, но и склоност кон чување прекрасни машини во заробеништво како музејски експонати.
И покрај децениите складирање, Miura S е во изненадувачки добра состојба, со оригинална боја и ентериер. Иако ќе треба темелна реставрација за повторно да биде исправна за возење, фактот дека ги има повеќето оригинални делови ќе ја олесни работата многу за експертите или одделот Polo Storico на Lamborghini.
Видеото откри дека Miura е продадена за цена помеѓу 1 милион и 1,2 милиони долари. Продавачот рече дека ја купил половна во 1980-тите за само 10.000 долари, што денес би било околу 35.000 долари, прилагодено на инфлацијата. Тоа е работа што изгледа речиси нереална, особено затоа што вредноста на автомобилот се зголемила повеќе од сто пати.
По продажбата, Miura била натоварена и транспортирана во безбеден магацин каде што го чека својот нов сопственик. Денес, зачуваните примероци достигнуваат цени од 1,5 до над 4 милиони долари на аукции. Интересно е да се спомене дека слична Miura S, пронајдена во Германија во 2019 година, била продадена за 1,6 милиони долари.