Грција најави значајна промена во системот за контрола на сообраќајните прекршоци – нов, целосно автоматизиран механизам кој ќе ги евидентира прекршоците и ќе ги блокира сите возила или лица што имаат неплатени сообраќајни казни при обид да ја напуштат земјата.
Според грчките власти, новиот систем ќе биде директно поврзан со граничните премини, полициските бази на податоци и камерите за сообраќај, овозможувајќи речиси моментално препознавање на регистарските таблички и личните податоци на возачите. Доколку системот открие дека за некое возило или лице постои неплатена казна – без разлика дали се работи за пребрзо возење, погрешно паркирање, поминување на црвено или друг прекршок – излезот од државата нема да биде дозволен сè додека не се подмири обврската.
Голем дел од туристите и патниците од соседните земји, меѓу кои и Македонија, честопати се соочуваат со казни за прекршок направен за време на одмор, но поради старите процедури многумина успеваа да излезат од земјата без да ја платат. Новиот систем има цел да го спречи токму тоа и да обезбеди еднаков третман за сите учесници во сообраќајот.
Грчките власти најавуваат дека со оваа мерка ќе се зголеми наплатата на казните, ќе се подобри безбедноста на патиштата и ќе се намали бројот на странци кои ја избегнуваат одговорноста. Планирано е системот целосно да стане функционален во наредните месеци, со што ќе се заострат контролите на граничните премини, пристаништата и аеродромите.
За сите патници препораката е едноставна: доколку добиете казна во Грција, најдобро е да ја платите веднаш, за да избегнете непријатности при напуштање на државата.
Извор: biznisvesti.mk