Д-р мед.сци. Маја Милованчева-Поповска
интернист-нефролог
ПЗУ Зегин Интермедика
Сите планови за здрава исхрана имаат неколку заеднички принципи:
Рамнотежа и разновидност. За да ги задоволиме потребите од хранливи материи, важно е да внесуваме разновидна храна богата со хранливи материи од сите групи на храна. Изборот на храна помага да ги внесеме хранливите материи без да внесуваме премногу калории. На секого му се потребни јаглехидрати, масти и протеини. Не постои магичен сооднос кон кој треба да се стремиме, сé додека избегнуваме крајности.
Многу растителна храна – зеленчук, мешунки, житарки, јадки и семиња, овошје. Богати се со витамини и минерали, влакна и фитохемикалии кои се природни супстанци во растенијата кои имаат антиоксидантна, антивоспалителна па дури и антиканцерогена активност. Оваа храна има релативно малку калории и е добра и за здравјето и за губење на тежина. Потрудете се половина од чинијата да биде зеленчук.
Соодветни протеини – важно е да се внесуваат доволно протеини кои заедно со физичката активност обезбедуваат да останеме силни, здрави и независни. Ограничен внес на месо го намалува ризикот од хронични болести. Растителните извори на протеини (грав, леќа, јадки, семиња) и морските плодови нудат големи здравствени придобивки.
Минимално преработена храна – ултра-преработената храна ја зголемува тежината и води до нездрави промени на шеќерот и мастите во крвта. При преработка на храната таа може да изгуби дел од хранливите материи, а воедно се додаваат дополнитени шеќери, масти (заситени), сол, адитиви и конзерванси.