Скопје повторно ќе биде центар на дигиталниот маркетинг. На 16-ти ноември, по 7-ми пат ќе се одржи единствената конференција за дигитални комуникации – AllWeb. Како и до сега, на сцена во Драмски Театар ќе се појават врвни говорници од Европа и светот, а едно од најзвучните имиња е Роџер Едвардс кој што е познат како плоден креатор на содржина, меѓународен keynote говорник, како и домаќин на популарниот подкаст за маркетинг и финансии.
ДИГИТАЛНАТА ТРАНСФОРМАЦИЈА- КЛУЧНА ЗА БИЗНИСОТ
Дигитална трансформација претставува процес на зголемена употреба на дигитални алатки и технологии од страна на една организација (компанија) со цел да се изврши коренита промена на внатрешните и надворешните процеси и функции на истата. Ако сака да успее на пазарот, секоја корпорација, бренд, мало или средно претпријатие, фриленсер, занаетчија, мора да се стреми кон тоа. Она што е важно и треба да се потенцира е дека дигиталната трансформација е предводена од стратегијата, а не од технологијата.
Токму ова ќе биде во фокусот на седмото издание на AllWeb, конференцијата за дигитални комуникации, што на 16-ти ноември ќе се одржи во Скопје. Покрај тоа, ќе се зборува и за иднината на (социјалните) медиуми и за други актуелни теми од светот на маркетингот и онлајн комуникацијата.
Најавено седмото издание на AllWeb- конференција за дигитални комуникации
“Седми пат по ред AllWeb ќе покаже зошто беше прва и се уште е единствената конференција за дигитални комуникации во Македонија. Листата на говорници ја составувавме многу внимателно за секој учесник да може да слушне нешто од неговото поле на интерес. За некои од посетителите, ова ќе биде ново и сосема поинакво искуство, за други ќе значи почеток на промена во работењето, за трети можеби и нови бизнис можности, но едно е сигурно- никој нема да остане рамнодушен“- вели Дарко Булдиоски, директор на програма на AllWeb.
На конференцијата се очекува учество на околу 300 претставници на високите одлучувачки структури во различни компании, маркетинг и професионалци за односи со јавноста, претприемачи. Покрај Роџер Едвардс, останатиот дел од говорниците на сцената се Мет Десмајер – директор на компанијата за стратешки комуникации Wise Old Uncle, Драган Варагиќ – консултант за дигитална трансформација и автор на книгата Дигитален Пре-маркетинг, Владимир Тошиќ – менаџер за дигитални комуникации во The Coca-Cola Company за југоисточна Европа и др. Влезниците се достапни преку официјалната веб страница на конференцијата: allweb.mk.